KADUROG

Kugoson mo an sakong kalag
kan saimong malumoy na mga takyag,
asin irani mo sa sakong mga sadit na talinga
an saimong ngosong an hamot orog pa sa sampaguita.

Oh! Mate ko an init kan saimong hinangos
hale sa kairaroman kan saimong daghan,
patos kan mga mahamis na tataramon
na minahaman nin buhay asin minabunga nin kagadanan.

Luhay-luhay mong iduta an saimong naglalaad
na mga ngimot sa sakong angog,
asin lahidan mo nin dikit na laway an
sakuyang mga ngabil na tinatakigan nin orog.

Togotan mong paboloson sa sakong hawak an ganot nin pagranga,
kasabay an pagturo kan sakong mga maiitom na luha,
sagkod na ako malamos...
asin mapatod an sakong sadiring hinangos.

Dai mo man tabi pagbutasan an sakong mga lapisay na mga kamot...
Dai mo man tabi pagtugotan na irayo an
saimong hawak sa matagas kong puso...
Dai mo man tabi paghaleon an
saimong mga ngabil sa saindang pinapahengaloan...

Nin huli ta...

habo ko nang matapos an bangging ini na ika kaibahan ko...
habo ko nang matapos an bangging ini na kadurog taka...

sa...

tabernakulo...